ការវាយតម្លៃពីសក្តានុពលនៃការអភិវឌ្ឍបៃតង៖ របាយការណ៍សិក្សាពីប្រទេសកម្ពុជា

ឯកសារនេះត្រូវបានរៀបចំឡើងដោយវិទ្យាស្ថានអភិវឌ្ឍន៍បៃតងសកល (GGGI) ជាផ្នែកមួយនៃការបន្ស៊ីគោលនយោបាយសម្រាប់កម្មវិធីអភិវឌ្ឍន៍បៃតង (PAGG) ឆ្នាំ២០១៧-២០១៨។ ការអនុវត្តទស្សនៈទាននៃការអភិវឌ្ឍបៃតង គឺជាឱកាសសម្រាប់ការបង្កើតភាពច្នៃប្រឌិត បង្កើតការងារ និងការវិនិយោគ។ ដោយឈរលើទស្សនៈទានដ៏សំខាន់នេះហើយ ទើបការវាយតម្លៃពីសក្តានុពលនៃការអភិវឌ្ឍបៃតង (Green Growth Potential Assessment - GGPA) បានរៀបចំឡើងដើម្បីស្វែងយល់ពីសក្តានុពល ឱកាស និងអាទិភាពនៃការអភិវឌ្ឍបៃតងរបស់ប្រទេសកម្ពុជា។ វិស័យអាទិភាពចំនួន ៤ ដែលបានកំណត់ឃើញ និងរៀបរាប់ក្នុងរបាយការណ៍នេះមាន៖ (១.) បង្កើនភាពធន់នៃវិស័យសេដ្ឋកិច្ចតាមរយៈការពង្រឹងសមត្ថភាពបន្ស៊ាំទៅនឹងការប្រែប្រួលអាកាសធាតុ (២.) ពង្រឹងភាពប្រកួតប្រជែង និងលើកកម្ពស់ជីវភាពប្រជាជននៅទីជនបទតាមរយៈការប្រើប្រាស់ថាមពលកកើតឡើងវិញ (៣.) ពង្រឹងការគ្រប់គ្រងធនធានធម្មជាតិ (៤.) បង្កើនផលិតភាពឧស្សាហកម្មតាមរយៈការពង្រឹងប្រសិទ្ធភាពនៃការប្រើប្រាស់ធនធាន។