ការតាមដានកម្មវិបាកនៃកម្មវិធីឧបត្ថម្ភសាច់ប្រាក់ជូនគ្រួសារក្រីក្រប្រយុទ្ធនឹងជំងឺកូវី-១៩

រដ្ឋាភិបាលកម្ពុជា បានអនុវត្តកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះ ក្នុងអំឡុងពេលប្រយុទ្ធនឹងជំងឺកូវីដ-១៩ ដោយជោគជ័យ ដើម្បីឆ្លើយតបនឹងបញ្ហាប្រឈមផ្នែកសេដ្ឋកិច្ច ដែលបង្កឡើងដោយជំងឺរាតត្បាតកូវីដ-១៩។ កម្មវិធីដែលបានអនុវត្តអស់រយៈពេល ៤៦ខែនេះ ជាកម្មវិធីផ្ទេរសាច់ប្រាក់ដ៏ធំបំផុតមួយ និងបានដំណើរការយូរនៅក្នុងប្រទេសកម្ពុជា ក្នុងគោលបំណងគាំទ្រ និងរក្សាលំនឹងជីវភាពគ្រួសារក្រីក្រ និងងាយរងគ្រោះ ដោយជំងឺរាតត្បាតនេះ។ ការវាយតម្លៃកម្មវិបាកចំនួន ៥ជុំ បានបង្ហាញថាកម្មវិធីឧបត្ថម្ភសាច់ប្រាក់នេះ បានផ្តល់ផលជាវិជ្ជមានខ្ពស់ដល់គ្រួសារទទួលផលរួមមាន៖ ការលើកកម្ពស់ចំណាយក្នុងគ្រួសារ ការបង្កើនសុខុមាលភាព និងភាពធន់ ការកាត់បន្ថយការលក់ទ្រព្យសម្បត្តិដើម្បីដោះស្រាយការលំបាលផ្នែកសេដ្ឋកិច្ច ការទទួលបានអាហារកាន់តែប្រសើរឡើង និងរបបអាហារចម្រុះ និងកាត់បន្ថយអត្រាបោះបង់ការសិក្សាក្នុងចំណោមកុមារ។