របាយការណ៍សង្ខេបស្តីពីការសង្កេតលើការអនុវត្តកម្មវិធីនយោបាយរបស់រាជរដ្ឋាភិបាលអាណត្តិទី៣ (កក្កដា ២០០៤-កក្កដា ២០០៦)

របាយការណ៍សង្ខេបនេះ ត្រូវបានចងក្រងឡើងសំដៅវាយតម្លៃលើការអនុវត្តការសន្យារបស់គណបក្សនយោបាយនៅក្នុងអំឡុងពេលឃោសនាបោះឆ្នោត និងកម្មវិធីនយោបាយរបស់រាជរដ្ឋាភិបាល អាណត្តិទី៣ ចាប់ពីខែកក្កដា ឆ្នាំ២០០៤ ដល់ខែកក្កដា ឆ្នាំ២០០៦។ នៅក្នុងរយៈពេល ១៨ ខែដំបូង បន្ទាប់ពីការបង្កើតរាជរដ្ឋាភិបាល ពីខែកក្កដា ឆ្នាំ២០០៤ ដល់ ខែធ្នូ ឆ្នាំ២០០៥ របាយការណ៍បង្ហាញថា កម្មវិធីនយោបាយ ជាមួយនឹងសូចនាករច្បាស់លាស់ ប្រមាណជា ៥% ប៉ុណ្ណោះ ត្រូវសម្រេចបានពេញលេញ ចំណែកឯ ៨០%ទៀត ត្រូវបានបំពេញដោយផ្នែក និង ១៥% ដែលនៅសល់ មិនទាន់ត្រូវបានបំពេញនៅឡើយ។ គិតមកដល់ខែកក្កដា ឆ្នាំ២០០៦ ៣០% នៃកម្មវិធីនយោបាយ ជាមួយនឹងសូចនាករច្បាស់ ត្រូវសម្រេចបានពេញលេញ ប៉ុន្តែ ៧០% មិនទាន់អនុវត្ត ឬបានអនុវត្តតែមិនទាន់ពេញលេញ។ បញ្ហារនៅសេសសល់ជាច្រើន ដែលតម្រូវកិច្ចខិតខំពីរាជរដ្ឋាភិបាលបន្ថែម រួមមានការពន្លឿនការងារលើការបង្កើតស្ថាប័នជាតិសំខាន់ៗ ដូចជាគណៈកម្មាធិការជាតិសិទ្ធិមនុស្ស និងតុលាការពិសេស កំណែទម្រង់ដីធ្លី និងការទទួលបានដោយយុត្តិធម៌ និងសមធម៌ ពីកំណើនសេដ្ឋកិច្ច។