លទ្ធផលលក្ខខណ្ឌសន្ទស្សន៍នៃវិស័យអាទិភាពនៅ២៤ មណ្ឌល (ខេត្ត-រាជធានី)

"យុទ្ធសាស្រ្តចតុកោណ ដើម្បីកំណើន ការងារ សមធម៌ ប្រសិទ្ធភាព ដំណាក់កាលទី២" ត្រូវបានអនុម័តដោយរាជរដ្ឋាភិបាលនៃព្រះរាជាណាចក្រកម្ពុជា សម្រាប់អាណត្តិទី៤។ ដោយសារតែវិសាលភាពនៃដែនអនុវត្តទូលំទូលាយ និងអត្ថន័យទូលាយទូទៅ គណៈកម្មាធិការខុមហ្រ្វែល យល់ថា ជាការចាំបាច់ក្នុងការប្រែសម្រាយឲ្យទៅជាយុទ្ធសាស្រ្តដែលអាចអនុវត្ត វាស់វែង និងសម្រេចបាននៅតាមមណ្ឌលបោះឆ្នោតនីមួយៗ (ខេត្ត-រាជធានី) ដែលម្ចាស់ឆ្នោតអាចកំណត់លក្ខខណ្ឌសន្ទស្សន៍នៃវិស័យអាទិភាព សម្រាប់ការអភិវឌ្ឍក្នុងតំបន់របស់ខ្លួនដើម្បីជម្រាបជូនដល់អ្នកតំណាងរាស្រ្ត រាជរដ្ឋាភិបាល ក្រុមប្រឹក្សា/គណៈអភិបាលខេត្ត-រាជធានី និងស្ថាប័នពាក់ព័ន្ធនានា។ សិក្ខាសាលាពិគ្រោះយោបល់ ត្រូវបានរៀបចំឡើងនៅ ២៤ ខេត្ត រាជធានី ជាមួយនឹងអ្នកចូលរួមសរុប ២.១០៤ នាក់ (ស្រ្តី: ៣៥%) មកពីស្ថាប័ននិងវិស័យផ្សេងគ្នា រួមមានទាំង ប្រជាសហគមន៍ អាជ្ញាធរមូលដ្ឋាន មន្រ្តីរាជការ ប្រព័ន្ធផ្សព្វផ្សាយ អង្គការមិនមែនរដ្ឋាភិបាល និងតំណាងគណបក្សនយោបាយ។