ឯកសារស្រាវជ្រាវសង្ខេប៖ យុវជនចូលរួមក្នុងនយោបាយនៅកម្ពុជា

សិក្សាចងក្រងដោយក្រុមយុវជនដែលយល់ដឹងខាងប្រព័ន្ធផ្សព្វផ្សាយ ហៅថា "ប៉ូលីទីកូហ្វី" និងក្រោមការគាំទ្រពីមូលនិធិខុនរ៉ាដអាដិនណៅអ៊ែ ប្រចាំប្រទេសកម្ពុជា ឯកសារស្រាវជ្រាវសង្ខេប មានគោលដៅកំណត់និន្នាការនៃការចូលរួមនយោបាយក្នុងចំណោមយុវជននៅប្រទេសកម្ពុជា តតាំងនឹងទស្សនអវិជ្ជមានដែលថាយុវជនមិនចាប់អារម្មណ៍ចូលរួមក្នុងនយោបាយ និង បំពេញឲ្យការសិក្សាស្រាវជ្រាវដែលមាន ដើម្បីបង្ហាញពីសារៈសំខាន់នៃការចូលរួមនយោបាយរបស់យុវជន។ ការសិក្សានេះ ផ្អែកលើទិន្នន័យទីពីរ ដែលបានមកពីប្រភពផ្សេងគ្នាដូចជា រាជរដ្ឋាភិបាល អង្គការមិនមែនរដ្ឋាភិបាល និងស្ថាប័នស្រាវជ្រាវ លើប្រធានបទយុវជន និងការចូលរួមក្នុងយោបាយ។ ការសិក្សាបង្ហាញថាមានភស្តុតាងគ្រប់គ្រាន់ក្នុងការសន្និដ្ឋានថា យុវជន មានឆន្ទះចូលរួមនយោបាយ តាមរយៈវេទិកាចូលរួមក្រៅផ្លូវការ បើទោះជាមានបរិស្ថាននយោបាយរឹតត្បិត បទដ្ឋានវប្បធម៌ កត្តាសេដ្ឋកិច្ច ឬការអប់រំមានកម្រិត។ និន្នាការនឹងបន្តរីកធំធាត់ ជាមួយនឹងភាពរីកចម្រើនខាងបច្ចេក វិទ្យា និងប្រឈមជាមួយការរឹតត្បិតខាងសង្គម និងនយោបាយ។