សៀវភៅណែនាំស្តីពីការគ្រប់គ្រងកិច្ចការរដ្ឋបាលរបស់រដ្ឋបាលក្រុង ស្រុក

រាជរដ្ឋាភិបាលទទួលស្គាល់តួនាទីដ៏មានសារៈសំខាន់របស់រដ្ឋបាលថ្នាក់ក្រុង ស្រុក ក្នុងការជំរុញ និងការលើកកម្ពស់លើការផ្តល់សេវាសាធារណៈ និងការអភិវឌ្ឍសេដ្ឋកិច្ច នៅតាមមូលដ្ឋាន ដើម្បីឆ្លើយតប ទៅនឹងតម្រូវការជាក់ស្ដែងរបស់ប្រជាពលរដ្ឋក្នុងដែនសមត្ថកិច្ចរបស់រដ្ឋបាលក្រុង ស្រុកនីមួយៗ។ ក្នុងន័យនេះ និងផ្អែកតាមការវិវឌ្ឍនៃកំណែទម្រង់វិមជ្ឈការនិងវិសហមជ្ឈការ រាជរដ្ឋាភិបាលបានដាក់ចេញនូវ សៀវភៅណែនាំស្តីពីការគ្រប់គ្រងកិច្ចការរដ្ឋបាលរបស់រដ្ឋបាលក្រុង ស្រុក ក្នុងគោលបំណងកែសម្រួលរចនាសម្ពន្ធនិងមុខងាររបស់រដ្ឋបាលក្រុង ស្រុកឱ្យក្លាយជារដ្ឋបាលមូលដ្ឋាន ជួរមុខដែលមានប្រព័ន្ធគ្រប់គ្រងស្របតាមគោលការណ៍នៃរដ្ឋបាលឯកភាព សំដៅលើកកម្ពស់ការអភិវឌ្ឍ សេដ្ឋកិច្ចមូលដ្ឋាននិងការផ្តល់សេវាសាធារណៈជូនប្រជាពលរដ្ឋក្នុងដែនសមត្ថកិច្ចរបស់រដ្ឋបាលក្រុង ស្រុក នីមួយៗ ឱ្យកាន់តែមានប្រសិទ្ធភាព តម្លាភាព គណនេយ្យភាព បរិយាបន្ន និងសមធម៌សង្គម។