យុទ្ធសាស្ត្រអភិវឌ្ឍន៍វិស័យមូលបត្រ ២០២៥-២០៣៥

វិស័យមូលបត្រដែលមានមុខងារក្នុងការកៀរគរមូលធន បាន និងកំពុងដើរតួនាទីយ៉ាងសំខាន់ក្នុងការរួមចំណែកដល់ការអភិវឌ្ឍសេដ្ឋកិច្ចជាតិ និងគាំទ្រដល់រាជរដ្ឋាភិបាលកម្ពុជាសម្រេចបាននូវចក្ខុវិស័យជាយុទ្ធសាស្ត្រ។ អាស្រ័យហេតុនេះ វាពិតជាមានភាពចាំបាច់ដែលត្រូវធានាឱ្យបាននូវការអភិវឌ្ឍវិស័យមូលបត្រប្រកបដោយសណ្តាប់ធ្នាប់ តម្លាភាព ភាពធន់ ជវភាព បរិយាបន្ន និរន្តរភាព និងនវានុវត្តន៍ តាមរយៈការដាក់ចេញនូវ យុទ្ធសាស្ត្រអភិវឌ្ឍន៍វិស័យមូលបត្រ ២០២៥-២០៣៥ ដែលមានភាពគ្រប់ជ្រុងជ្រោយ។ យុទ្ធសាស្ត្រនេះ នឹងបង្ហាញពីក្របខ័ណ្ឌយុទ្ធសាស្ត្រពង្រឹងទីផ្សារមូលបត្រ​ និងពង្រីកទីផ្សារមូលបត្រ ដែលរួមបញ្ជូលទាំងបច្ចេកវិទ្យាហិរញ្ញវត្ថុ និងហិរញ្ញវត្ថុចីរភាព និងគាំទ្រការអភិវឌ្ឍទីផ្សារមូលបត្រ។ ដោយភាពប្រទាក់ក្រឡាគ្នារវាងសេដ្ឋកិច្ច ធុរកិច្ច និងវិស័យហិរញ្ញវត្ថុ ដូចនេះវាពិតជាចាំបាច់ដែលត្រូវមានអភិក្រមនៃកិច្ចសហការជាមួយគ្រប់ភាគីពាក់ព័ន្ធទាំងអស់ ដើម្បីអភិវឌ្ឍវិស័យមូលបត្រ។