សារាចរលេខ ០៩ ស្តីពីការរៀបចំក្រុមការងារតាមដាន ត្រួតពិនិត្យ និងវាយតម្លៃការអនុវត្តយុទ្ធសាស្ត្រផែនការអភិវឌ្ឍន៍ និងគោលនយោបាយនានា នៅតាមក្រសួង ស្ថាប័ន

ដើម្បីធានាដំណើរការអនុវត្តការងារដែលចង្អុលបង្ហាញដោយយុទ្ធសាស្ត្របញ្ចកោណ ដំណាក់កាលទី១ សំដៅធានានូវស័ក្តសិទ្ធិភាព និងប្រសិទ្ធិភាព រាជរដ្ឋាភិបាលបានដាក់ឱ្យអនុវត្តនូវយន្តការការងារចំនួនបី៖ (១) យន្តការដឹកនាំនិងសម្របសម្រួល (២) យន្តការអនុវត្ត (៣) យន្តការតាមដាន ត្រួតពិនិត្យ និងវាយតម្លៃ។ ឈរលើមូលដ្ឋានខាងលើ រាជរដ្ឋាភិបាលសម្រេចដាក់ចេញនូវគោលការណ៍ពាក់ព័ន្ធនឹងការរៀបចំក្រុមការងារទទួលបន្ទុកលើកិច្ចការតាមដាន ត្រួតពិនិត្យ និងវាយតម្លៃការអនុវត្តយុទ្ធសាស្ត្រ ផែនការអភិវឌ្ឍន៍ និងគោលនយោបាយនានា ហៅកាត់ថា​ "ក.យ.ផ.គ" នៅតាមក្រសួង ស្ថាប័ន ដោយកំណត់៖ (១)​ រចនាសម្ព័ន្ធស្ថាប័ន ដោយប្រើប្រាស់ធនធានមនុស្ស និងហិរញ្ញវត្ថុដែលមានស្រាប់ប្រចាំក្រសួង ស្ថាប័នសាមីអោយអស់លទ្ធភាព (២) តួនាទី និងភារកិច្ចគោលចំនួន ១១ ផ្តោតលើកិច្ចការងារតាមដាន ត្រួតពិនិត្យ និងវាយតម្លៃការអនុវត្តយុទ្ធសាស្ត្របញ្ចកោណ ដំណាក់កាលទី១ ឱ្យមានប្រសិទ្ធិភាព និងដោយស្មារតីទទួលខុសត្រូវខ្ពស់។