ដើម្បីអនុវត្តឱ្យបានសម្រេចនូវគោលដៅអភិវឌ្ឍន៍ ដូចមានកំណត់ក្នុង យុទ្ធសាស្ត្រចតុកោណ-ដំណាក់កាលទី ៣ រាជរដ្ឋាភិបាលប្តេជ្ញាបន្តអនុវត្តគោលនយោបាយ និងយុទ្ធសាស្ត្រអភិវឌ្ឍប្រកបដោយប្រសិទ្ធិភាព។ គោលនយោបាយ និងយុទ្ធសាស្ត្រទាំងនេះ ក៏បានរំលេចអំពីក្របខណ្ឌសម្រាប់តាមដានលទ្ធភាព និងការប្តេជ្ញារបស់រាជរដ្ឋាភិបាល ក្នុងការជំរុញភាពស័ក្តិសិទ្ធិក្នុងកិច្ចអភិវឌ្ឍន៍។ ទន្ទឹមនឹងការបន្តពង្រឹងភាពជាម្ចាស់ និងភាពជាអ្នកដឹកនាំក្នុងកិច្ចអភិវឌ្ឍន៍ រាជរដ្ឋាភិបាលបានចូលរួមក្នុងកម្រិតសកល ជាមួយតួអង្គអភិវឌ្ឍន៍ដទៃទៀត ដើម្បីរៀបចំ សេចក្តីថ្លែងការណ៍ទីក្រុងប៊ូសានស្តីពីភាពស័ក្តិសិទ្ធិក្នុងកិច្ចអភិវឌ្ឍន៍។ រាជរដ្ឋាភិបាលបាន និងកំពុងអនុវត្តគោលការណ៍ និងសកម្មភាពនានា ដែលមានចែងក្នុងសេចក្តីថ្លែងការណ៍នេះ ដោយផ្អែកលើបរិការណ៍កម្ពុជា ដើម្បីឆ្លើយតបនឹងតម្រូវការពិតប្រាកដក្នុងកិច្ចអភិវឌ្ឍន៍របស់កម្ពុជា។ ក្នុងស្មារតីនេះ រាជរដ្ឋាភិបាលបានរៀបចំ យុទ្ធសាស្ត្រស្តីពីកិច្ចសហប្រតិបត្តិការអភិវឌ្ឍន៍ និងភាពជាដៃគូដើម្បីជម្រុញភាពស័ក្តិសិទ្ធិក្នុងកិច្ចអភិវឌ្ឍន៍ ក្នុងបរិការណ៍កម្ពុជា ដោយរំលេចអំពីបណ្តាសកម្មភាពអាទិភាព ដែលត្រូវបអនុវត្តសម្រាប់បន្តពង្រឹងភាពជាដៃគូក្នុងកិច្ចអភិវឌ្ឍន៍ ព្រមទាំងបានកំណត់របៀបរបបការងារ សម្រាប់ឆ្នាំ ២០១៤-២០១៨។

• ភាសាខ្មែរ